Akademîsyenî û dewleta mafya – ULKEM ZEREMYA

ULKEM ZEREMYA

@zerya_zagros

11ê Çile de, Stenbol û Enqera de, 89 zangehan ra, hezar û 128 Akademîsyenan danezanê ‘ma nêbenê piyakarê herbî’ aşkere kerdî, verra herbê qilêrîn yê AKP vejyay û hikûmet îqaz kerdî. Danezanê akademîsyenan ebi ziwanandê Tirkî, Kurdî, Îngilizî, Fransî, Almanî û Îspanî ame weşînayen. Zerreyê akademîsyenê ke îmze eştî danezanî de, akademîsyenê zey Noam Chomsky, Davîd Harwey, Etîenne Balîbar, Judîth Butler, Immanuel Wallersteîn û 300 kesê zane yê ke dinya de namedarîyê zî estê. Siyasetê Tirkiye bi no eşkerakerdiş lerziya, qiyamet werziya. Çapemeniya Seray desinde destpa propagandayê sîya û teşîrkerdiş da destpakerdiş. Dîktatorê dergî nê kesanê zane zey ‘terorîst’ biname kerd, hedef damusna û va şima ya dewlet het de yê, ya kî terorî yê. Rojnameyanê ci bi manşetanê ‘xayin’ ‘piyakarê sûcê PKK’, ‘akademîsyenê xendekçî’ akademîsyenan sûcdar û teşîr kerd. Reîsê mafya û çeteyê Erdogan’î Sedat Peker’î zî bi vatenanê ‘ma dê çirik bi çirik goniya înan birijnê û bi na gonî dûş bikerê, wa kes ma ra merhamet nêpawo’ provayê qetlîam kerd. Derheqê akademîsyenan de cipersyayen ame destcikerdin û qeyliyê ci amey binçimkerdin. Xeylê akademîsyenî zî karî ra amey eştiş.  Rindo, la nê akademîsyenan danezanî de se vatî ke, zey sûcê gird yeno vînayen. Akademîsyenan waştî ke, herbê qilêrîn yê verra welatijan, ablûqayê dewlet yê verra sûkanê Kurdistan vindero. Waştî ke hikûmet polîtîkayanê qetlîam hu sirgûnî ra fek virado, mesûlê merdişan bîrê cezakerdin. Zewbîn niya vajiya: “Komara Tirkiye hemwelatijanê xo, Sûr, Farqîn, Nisêbîn, Cizîr, Sîlopî û xeylê cayanê bînan de, bi ‘qedexe’yan, hefteyano mehkûmê veyşanî û teyşanî kerdo, bi tifinganê giran êrişê ci kena, heqê weşî û azadî binling kena. No qirkerdişê bi qesit û plankerdî, Tirkiye hiqûqa xo û mavênnetewî îxlal kena. Gerek dewlet polîtîkayanê qirkerdin û sirgûnkerdin yê verra şarê Kurd û pêrokîn şaran ra fek virado. Gune ‘qedexe’ yê vetişê kuçeyan bîrê wedarnayen, mesûlê binlinkerdişê heqan bîrê cezakerdin. Gune destûr bîro dayen ke, heyetê mavênneteweyî şirê nê cayan de tespîtê xesarî bikerê û rapor hadre kerê. Ma erz kenê ke, serva ronayişê haştî rayê çarekerdin bîrê akerdin, hikûmet çarçoveyê îradeyê siyasî yê Kurdan de, xerîteya ray virazo. Zey akademîsyen û cigeyrayoxî, ma beyan kenê ke,  ebi bêveng mendiş ma nêbenê piyakarê sûcî.” Sûcê nê akademîsyenan waştişê haştîyo. Aqilê corîn yê dewlet kesê ke propagandayê herb kenê zey dost, yê ke behsa haştî kenê zî zey dişmen vîneno. La çiyo ke omidê haştî keno gird noyo ke, akademîsyenê ke, hetê sermiyan û sazgehanê dewlet yenê cezakerdin, waştenanê xo ra peyser gam nêerzenê. Badê pêrokîn tehdîdan homarê akademîsyenan didi hezarî ra bî vêşî. Verra cipersyayen û tehdîdan hewldayen û tekoşînê akademîsyenan ramenê. Bi seyan hunermendê tiyatro û sînemayî zî paşt day akademîsyenan. Se vajime, Heq-Homa tayn aqil bido na dewlet. Pêrokîn dinya goş dano ‘akademîsyenanê’ xo, la Tirkiye ‘terorîst’ îlan kena. Gerek jew Erdogan’î rê vajo, akademî çiçîyo, akademîsyenî kamî yê…?

• Allgemein